Hvar er fuglasöngurinn? Er bara 'GARG' og 'KRUNK' í boði í Vesturbænum?

Eftir vangaveltuna mína um fuglasönginn hef ég nú ákveðið að bíða eftir að trén laufist áður en ég fer að æsa mig alvarlega. En ítrekaðar morgunrannsóknir mínar hafa leitt eftirfarandi í ljós:

1. Mávagarg
2. Krunk
3. Ískur í ryðgaðri rólu

...Ekkert af þessu gefur góð fyrirheit um að ég geti vaknað upp við neitt í líkingu við fagurgalann frá þarsíðasta bloggi!

Snemma í vikunni settist ég út á svalir fyrir kl. 6 um morguninn og áttaði mig á því að líklega hefði ég vaknað upp við hlakkandi og gaggandi mávagargið sem bergmálaði í hverfinu. Skömmu síðar sveimaði skimandi sílamávur yfir og skannaði garðana. Næsta fiðurfé var einmanalegur og óttasleginn starri á miklum hraða í vesturátt sem sleikti trjátoppana... Mikið að flýta sér, alveg steinhljóður! Því næst kom dimmraddað "KRÚNK" úr þarnæstu götu, svona eins og til að tryggja að allir nærstaddir spörfuglar hefðu sig hæga. Þeir hafa greinilega fengið skilaboðin. Málið var útrætt! Ég fór hryggur í bragði inn og fékk mér "kríu" þangað til vekjaraklukkan galaði.

Ég vona svo sannarlega að þetta umsátursástand sé ekki viðvarandi í fuglaríki vesturbæjarins en lofa að halda áfram að fylgjast með.

Sorry með þetta nöldur, ég bara fíla fuglasöng. Mávahlátur og krunk líka, en ekki ef það útrýmir restinni. Ég hef ekki heyrt svo mikið sem ískur í ryðgaðri rólu undanfarna morgna!

Athugasemdir

[Þorsteinn Valur Baldvinsson, 3.5.2008 kl. 20:49]

[Tiger, 3.5.2008 kl. 23:06]

OMG ... hvað maður getur stundum lesið vitlaust.

Úr fyrirsögninni las ég að "Garg og 'Runk'" væri í boði í vesturbænum hahaha... var að hugsa um að kíkja þangað - en er hættur við fyrst það er bara Krunk.. ;)

[Tófulöpp, 5.5.2008 kl. 00:24]

Hvaðahvaða... Það er margt fleira í boði í vesturbænum krúsíkall, og sumt af því bara ansi eftirsóknarvert skal ég segja þér :)