Alltaf fjör í Víðidal :)

Að henda mannfólki af baki er holl og góð skemmtun. Þið sjáið bara hvað þessi hryssa er afslöppuð og í góðum fíling. Þarna smellti ég mynd af henni þar sem ég var nýbúinn að spretta af henni. Fyrst spretti hún mér af sér!

Einn af gömlu, reyndu hestamönnunum þarna í hverfinu sá til mín þar sem ég var að fara á bak, og reyna að tjónka við óþekktar brokkklárinn fyrir nokkrum dögum. Honum leist ekki meira en svo á aðfarirnar að hann spurði með allnokkrum þjósti: "Hver á þennan hest?... Já, hver á hann?" Þegar ég svaraði því spurði hann að bragði "Er honum eitthvað illa við þig?" Ég verð nú að taka fram að ég held að þessum öðlingum sem hafa verið svo góðir að lána mér reiðskjóta sé báðum frekar vel við mig. Og ég má líka til með að segja að nálægir hestamenn hafa verið mjög viljugir að hjálpa með ráðum og dáð þegar ég hef lent í klandri.

Stæltur og klár tamningamaður sem tók á móti þegar við höltruðum hnípin og rykfallin heim með klárana okkar spurði hvort hann mætti taka í skepnurnar, við héldum nú það. Sú jarpa stympaðist og þráaðist svo lengi við áður en hann gat komið henni frá húsinu að okkur, ólánlegustu hestamönnum Víðidals, leið ekki lengur eins illa að hafa lent í vandræðum. Það var sömuleiðis svolítill plástur á sálina þegar hann sagði að brúna merin væri ljónviljugur og spennandi hestur en alls ekki á færi viðvaninga að stýra henni.

Takk fyrir alla hjálpina kæru hestamenn og ég veit þið þakkið okkur líka fyrir skemmtunina. Það er alltaf fjör í Víðidal þegar við förum á hestbak

 

Athugasemdir

[Tiger, 22.4.2008 kl. 14:08]

  Það er greinilega alltaf mikið fjör og læti í kringum hestamennskuna.. reyndar er ég ekki hestamaður en ég hef þó oft verið í kringum hestafólk og það er ætíð mikið fjör þar. Eigðu góðan dag...

[Tófulöpp, 23.4.2008 kl. 01:05]

Nú ég sé þig alltaf fyrir mér í leðri og reiðtygjum og með keyrið á lofti   :) En já, það er alltaf líf í tuskunum þegar maður er að truntast, mesta furða að maður sleppi óbrotinn (7-9-13)

[Tiger, 24.4.2008 kl. 14:58]

  I tell you ... im hot in that múnderingu. Ég er náttúrulega alger töffari í leðri og svipuna nota ég ekki bara spari sko! Svona guttar eins og ég fara oft í Lögreglubúninginn þó maður sé ekki endilega Lögga..*flaut*.

Gleðilegt sumar og farðu varlega when you are "á baki"... *glott*.